بحكم اني استفدت من الناس هنا بالموقع جزاهم الله خير بحاول اشرح مرحلة تقديم معاملة زواج سعودية من مقيم يمني مولود بشكل مبسط
أول شي قدمت عن طريق المحافظة وكان اون لاين اخذت 3 أيام وراحت الشرطة راجعنا الشرطة بعد صدورها ب 3 أيام واخذنا ورقة الطلبات وبدا تحضير الطلبات والاوراق معروفة ما اذكرها بس المستغربة كانت انهم ماطلبوا مني شهادة ميلادي السعودية (فسرت انهم استغنوا عن تقديمها لانهم يعرفوا بطرق اخرى مو لانو مو فارقة المعاملة مولود أو لا هذا غير صحيح تفرق لو مولود)
اخرت تجهيز اوراقي ورقة خلو سوابق من اليمن وانا اغلب اهلي هنا وقرايبنا استعنت بصديق الله يجزاه خير وسويت وكاله في القنصلية اليمنبة بجدة ورسلها بس قعدت شهر وجات وصدقتها من الخارجية والسفارة السعودية المفوضة بنفس وزارة الخارجية وبقية الاوراق المعروفة مثل شهود عدم زواجي مصدق من عمدة الحي ورقة تعريف العمل بالراتب خلو سوابق سعودية .... الخ
كملت الاوراق والفحص الطبي ورحنا الشرطة قدمناها استلمتها الموظفة وقالت انتظر اسبوعين الى 3 اسابيع الين يجيك رسالة برقم صادر تحويل المعاملة من الشرطة للمحافظة
وجا وقت الحيرة والانتظار .. الايام ثقيلة تدعي الله وتستغفر واحسن ظنك بالله وخذ بالاسباب واقبل كل ما كتبه الله وثق تماماً انه الخير الله ما يجي منه الا الخير ..
عدت العشرين يوم ورحت الشرطة اخذت رقم القيد مع انه جا برسالة لعمي (أبو خطيبتي) انتظر تسجيل ورودها في المحافظة وكان بعد 3 ايام من تحويلها من الشرطة للمحافظة قعدت 3 ايام في المحافظة وثم صدرت الى امارة منطقة مكة المكرمة وقعدت كمان 3 ايام لين ظهرت في اون لاين الامارة استعلام عن معاملة
برقم الخطاب اللي حيصدر من المحافظة تقدر تطلع رقم القيد من نتيجة البحث في موقع الامارة يوم ظهرت قعدت بحالة تحت المعالجة لمدة اسبوعين كاملة بعدين ظهرت بحالة تحت الاجراء بدون اي اقسام بس كلمة تحت الاجراء وتاريخ الاجراء يتغير كل يومين استغربت صرت اروح الامارة رحت مرتين وما عرفت اش الاقسام اللي عدت منها غير توقيع سمو الامير والمطالبات الخاصة والصادر الخطي وبعدها صدرت بفضل الله الى المحكمة الحمدلله والشكر عقبال الجميع يااارب دعواتكم الله يبارك لنا ولكم
أكثروا من الاستغفار وأسألوا الله وأكثروا الدعاء بالسجود
اللَّهمَّ لا سَهلَ إلَّا ما جَعَلتَه سَهلًا، وأنتَ تَجعَلُ الحَزْنَ إذا شِئتَ سَهلًا
