السلام عليكم ..
اخواني واخواتي للي يرغب يقدم معاملة زواج اجنبي من سعوديه حبيت اطرحلكم تجربتي واللي كانت سهله الحمدلله رغم وجود بعض العقبات الخفيفه اللي لازم منها من بعض الداوئر الحكوميه..
سعوديه عمري ٣٠ موظفه حكوميه
يمني عمره ٣٢ موظف قطاع خاص
اولا: انا قدمت المعاملة من الامارة نفسها اللي في جده بخطاب بسيط كتبتو والموظفه اعطتني نسخه اكتب زيها وخلي معاكي رقم اقامة خطيبك لانو ممكن تكتبيها وجاتني رسالة من الامارة برقم المعاملة بانو تم تدقيقها وراح تجي رسالة تانية بانه تم صدور المعاملة الى شرطة المحافظه
ثانيا: (الشرطة) حتروحي شرطة النسيم الجديد قسم النساء عند مكتب الزواج حيكون اول ماتدخلي من بوابة الشرطة على يمينك و ادوني ورقه في طلباتي وطلبات خطيبي واعطوني ورقه اعبيها فنفس الوقت والطلبات كانت
1-مشهد للادلة الجنائية ( البصمات للاجنبي)
2-مشهد اختمه من عمدة الحي اني ربة منزل في حالة المخطوبة موظفة راح يطلبو برنت من الاحوال المدنية (هنا سارتلي مشكله لانو انطبع البرنت ومكتوب ربة منزل وانا موظفه ومارحت لمن اتوظفت غيرت المهنه واضطريت اتاخر واروح الاحوال واغير المهنه واجيب ورقة تعريف براتب عشان دي النقطه فأرجوكم انتبهو وقت طباعة البرنت ايش مكتوب)
3-خطاب تعريف بالراتب للطرفين..
4- الفحص الطبي في الاقليمي(بالنسبه ليا كانت سهاله الحمدلله رحت انا وخطيبي الساعه ٧ وسحبنا رقم وحللنا بدون موعد من النت وخرابيط ويدفع الاجنبي ٧٥٠ ريال)
وارجوكم اتاكدو من التحاليل بنفسكم انكم تستلموها لانها سارت معايا حركه وسخه وكزبو عليا وكنت ما اتزوج بسبب غلط منهم وانو خطيبي مريض بس طلع سليم الحمدلله
5- الصورة والاصل لهوية المخطوبة والاقامة للخاطب والجواز اصل وصورة كلها تنحط في ملف اخضر علاقي (حيقولولك اقطعي الحديده اللي من الجنب عشان ماتتشقق ملفات غيرك ههههههه حتى دي النقطه مانسيتها وكتبتها لكم )
وبعدين رجعت واديتهم الملف بعد ما كملنا الاوراق قالتلي استني شهر ونص وتجيكي رساله من الاماره وجاتني رسالة من الامارة بانو المعاملة اتسجلت في في محافظة جدة وفيها رقم صادر وطبعا دا حيتغير الرقم يعني حتدقي على رقم الاماره وتطلبي قسم الموافقات حق الزواج ويعطوكي رقم جديد وحتتابعي بالرقم خط سير معاملتك من الموقع الين ماتشوفي المعامله وصلت محكمة الاحوال الشخصيه هنا حتخلي خطيبك يروح المحكمه ياخد موعد للعقد بس يروح بعد اسبوعين الين ماتوصل المعامله
واحيانا تتحول للداخليه وتقعد شهر يعني انتي وحظك
انا اتحدد موعدي تاني يوم الحمدلله ورحت انا وبابا واتنين شهود سعوديين
وطبعا عادي اي احد من اهلك يدخل معاكي مكتب الشيخ اللي يعقد و(نصيحه) روحي بنفسك عشان حيكون شعور حلو وغريب ويحززززن فنفس الوقت لمن تشوفي انو مسؤوليتك اتنقلت من ابوكي لشخص اخر بكلمة (قبلت) و ( زوجتك)
ملاحظه ( مدة المعامله من يوم تقديمي الى يوم العقد تقريبا ٥ شهور فقط)
طبعا سارت عقبات ومشاكل زي ماقلت في طووول المعامله دي بس مع الدعاء واليقين مرت وعدت الحمدلله تمت بدون اي معقب وواسطه وكلام فاضي ولحد يضحك عليكم بالمعقبين ترا سهل الموضوع
الحمدلله دوما و ابدا و اشكر كل من تعب معايا في الرد فالموقع دا وانا مستعده ارد على اي استفسار هنا
والعاقبه للجميع باذن الله
