انا قدمت لي انا من مكة في فبراير ٢٠٢٠والمعاملة تبعي وصلت الاحوال من زمان.
وخطيبي هندي مقيم من جدة مو من مواليد السعودية. فقالوا لازم يقدم من جدة.
الاوراق كلها جاهزة والامور كلها تمام معاد ورقة خلو السوابق. هو جابها من سفارة الهند من هنا بعد ما استلموها من الهند وختموها هنا. بس لما رحنا نقدم الموظفة في مكتب الشرطة رفضتها تقول لازم يجيب خلو السوابق من الهند وتختم في السفارة السعودية في الهند. طبعا وتقفلت الدنيا بسبب كورونا. لأن اخوه هناك لما راح يطلعها له، قالوا له ما ينفع، لازم يجي بنفسه عشان بصمات الاصابع والصورة الشخصية ياخذوها عندهم واتوقع بصمة العين، لانها من مكتب الجوازات هناك فتعامل معاملة الجواز، التقديم الحضور شخصيا. من وقتها الى الان مو عارفين ايش نسوي. راح وزارة الخارجية وختموها له وقالوا له ان شاء الله تمشي. فلما رحت للموظفة مرة ثانية، قالت هذه من السفارة من هنا فما تنفع، لازم يجيبها من الهند مختومة من السفارة السعودية في الهند.
معقول يا جماعة؟ طيب والحل؟ انتوا شايفين الوضع والسفر كيف. ايش الحلول؟ لان لسه نعتبر ما قدمنا، فيعني اوردي راح يكون في تأخير بعد التقديم كمان. والله اني محبطين جدا ومحنا فاهمين الفرق بين الورقتين. والخارجية حاطه الختم الرسمي يعني.
عندكم فكرة؟ افكر اروح الامارة بعد العيد اشوف اذا بسبب الظروف الراهنة يقدرون يسوون لي شي ولا ايش تتوقعون؟ احد صاير له اللي صاير معانا؟
شكرا لكم مقدما
