يمنية متزوجة سعودي وقدمت تصحيح وضع

Question

السلام عليكم بسألكم الله يرضى عليكم تجاوبوا انا يمنية متزوجة سعودي من ١٥ سنه وعندي ثلاثه اطفال مضافين مع ابوهم في كرت العائلة وتزوجته وعمري ١١ سنه وكنت طفله ما افهم في الانظمه والقرارات  وابويا متوفي في السعوديه من زمان وعندي شهادة الوفاة وانا بنته الوحيده مقطوعه من شجره وانا من مواليد اليمن بس دخلت مع ابويا السعوديه وانا رضيعه وعشت مجهولة الهوية ومن فترة بسيطه طلعت جواز يمني وقدمنا في تصحيح وضع الزواج بس خايفه ينرفض ولا يجيني ترحيل وانا يتيمة الام والاب وماعندي احد في اليمن وماعندي الا زوجي وعيالي بعد الله ويقولون يجي ترحيل ليش دخلت السعوديه من غير اقامه وانا كنت رضيعه وش عرفني الله المستعان كنه بيدي وليش ما عندي اقامه، كثير خايفه وعندي اوراق من الشرطة والامارة ومشهد على الزواج، بس الزواج بدون موافقه وخايفه الله يسامح اهلي ويغفر لهم، الله يوفقكم اللي عندهم علم يفيدوني جعلكم الجنة

Comments

السلام عليكم ورحمة الله وبركاته
تفاصيل سير معاملتنا تصحيح وضع اجنبيه من مواطن سعودي وعندنا اطفال) كانت بداية المعاملة ١٤٤٣/١٢/١ خلصنا الاوراق المطلوبة وانتظرنا لبعد العيد  وتحولت للمحافظة بتاريخ ١٤٤٤/١/٢٠ الرساله كالتالي: (معاملتكم رقم بمحافظة ضمد جلست يومين وصدرت الى امارة منطقة جازان تاريخ ١٤٤٤/١/٣٠ قيدت
 ⁃ تحت الاجراء جلست عندهم حتى ١٤٤٤/٤/١٥ وتحولت وزارة الداخلية جلست شهر بالضبط وصارت مغلق دقينا عليهم قالوا تصدرت للأمارة بخطاب مساءلة عن الزواج وصلت ١٤٤٤/٧/٢ للشرطة وطبعًا رد زوجي عليهم جاهل في النظام وماعندي اي معلومات عن نظام الزواج من الاجانب ومشوها ورجعت من الشرطة الامارة
 ⁃ تحت الاجراء شهر ونص تقريبًا وفي ١٤٤٤/١٠/٢٥ تحولت وزارة الداخلية بالحقوق الخاصه بعدها بعشرين يوم بالضبط صارت مغلق وحولوها الشؤون الامنية من ١٤٤٤/١٢/١ حتى ١٤٤٥/٢/١١ جتنا رسالة من الداخلية تم تحويل المعاملة الى وزارة العدل
 ⁃ تاريخ رسالة ناجز ١٢-٠٢-١٤٤٥ وكان نص الرساله كالتالي: (صاحب الهوية ******** نشعركم بوجود معاملة لكم لدى الإسناد المركزي للتوثيق لتوثيق (معاملة رقم )، يمكنكم التقدم بطلب جديد من خلال خدمة (توثيق حالة اجتماعية) عبر البوابة الإلكترونية (ناجز) لاستكمال إجراءات التوثيق من خلال الرابط التالي:           https://*.moj.gov.sa/2y7hw7recf) الطريقة انك تختار توثيق زواج سابق ونعبي البيانات الولي والزوج والزوجه واثنين شهود.
       وهنا كانت الحفلة انا ماعندي ابشر عشان تجيني رسالة التصديق وماكنت فاهمه انو عادي يقدرون يرسلونها لي من ناجز نفسه اذا كلمتهم انو ماعندي ابشر على بالي ما تجي الا يكون فيه ابشر المهم عبيت الطلب وارسلته ورجع الطلب يبغون تاشيرة الدخول وانا ماعندي وتحطمت احسب بتروح علينا الموافقة لين الله هداني كتبت لهم في الطلب انا ماعندي أبشر ولا تاشيرة دخول ماعرفت نفسي الا في السعودية من يوم انولدت لا طلعت ولا دخلت والحمدلله قبلوا كلامي ودقوا علي الوزارة وكلمتني وحده وقلت لها وضعي كامل الحمدلله قالت تمام طيب الولي اللي عقد لك وينه قلت لها متوفي من زمان قالت حلو ارفقي شهادة الوفاة ولا حصر ورثه وكلهم مافي قلت لها اقولك يا بنت الحلال انا ادمية ماعندي الا اوراق من المستشفى والشرطة تثبت انو ابويا متوفي حصر وشهادة وفاة مافي وقفلت منها وارسلوا الطلب من جديد ارفق اوراق ابويا انو متوفي ارفقتها وكلمتهم في الطلب انو انا اهلي كلهم متوفين وابويا متوفي وماعندي لا اخوان ولا اقارب وذي كل الاوراق اللي عندي ارفقتها والحمدلله بعدها بثلاثه ايام ارسلوا روابط المصادقة لي وللشهود و زوجي وجتني عن طريق ناجز رساله نصية بالمصادقه صادقنا وبعدها بيوم جتنا الوثيقه م شاءالله بفضل الله تيسرت شكرًا لكل شخص طمني بكلمه طيبة

Answer 1

وعليكم السلام ورحمة الله وبركاته .. ما اقول الا الله يسهل أمرك ويفرج همك.. عليك بالاستغفار والدعاء وبإذن الله تتيسر .. وتمشي امورك

Comments

جزاك الله خير الله يفرج علي وعليك وعلى جميع المسلمين

Answer 2

مايجيك ترحيل ان شاء الله انتي زوجة مواطن وام مواطنين بالعكس بيتصحح وضعك اكملتي ع زواجك ٧ سنوات اذا تعقدت امورك بيطلبون فحص دي ان اي فقط ولا الموافقه بتجيك بإذن الله كثير اللي اعرفهم نفس وضعك وتصححت أوضاعهم

Comments

الله يسمع منك وييسر امورنا التحليل يطلبونه مني انا ولا من ابوهم لانهم مضافين معاه خلاص

---

السؤال المهم .. لما انضافو الأبناء في كرت العائلة هل يوجد اسمك في شهادة الميلاد .. هذا اكبر اثبات ولا يحتاج فحص او تحاليل .. ولا يوجد ترحيل .. متى قدمتو معاملة تصحيح ؟

---

ايوه موجود اسمي في شهادة الميلاد وكلهم جبتهم في مستشفى حكومي بالأوراق   اللي من الامارة والشرطة ومشهد الزواج ،قدمنا من شهر تقريبًا على الامارة بالأوراق